A parella arbitral formada por Pedro Eiras e Lucas Crespo é a única galega que hai en División de Honra Prata esta tempada e será a encargada de impartir xustiza este sábado (18:00 horas) no derbi do Lérez. Esta é a súa primeira tempada como parella nesta categoría, e o inicio está a ser moi positivo para estes dous colexiados galegos.
Lucas Crespo (1992, Ribadavia) comezou a arbitrar en 2008 nun curso que deu Rafa García Mosquera na súa localidade e foi alí animado polo CDC Ribeiro, onde xogou dende os 5 anos. “Ao comezo non te atrae moito e prefires seguir xogado pero pouco a pouco vaste dando conta de que engancha tanto ou máis que xogar e por iso, cando xa non podía compatibilizalo, apostei pola arbitraxe”, indicou o colexiado galego.
Pedro Eiras (1991, Vigo) tamén comezou como xogador (Octavio e Porriño), pero a pesar da súa xuventude leva xa 15 anos arbitrando (11 en categoría nacional), seguindo a estela do seu irmán: “Fíxenme árbitro, supoño que inconscientemente por seguir os pasos do meu irmán Fernando Eiras, un referente na arbitraxe galega”.
Esta é para Pedro e Lucas a súa primeira tempada como parella de forma oficial, aínda que con anterioridade xa arbitraran moitas veces xuntos. Ademais, teñen a favor a súa amizade. “Está a axudarnos moito o ser amigos desde hai máis de 10 anos porque iso fai que confiemos plenamente no compañeiro. Eu véxoo como algo primordial, a confianza dun no outro fai que podamos estar tranquilos no partido. Sabemos que facendo cada un o noso traballo todo vai ir ben”, explicou Lucas.
Para Lucas esta tempada está sendo de adaptación a “unha categoría nova e un xogo moi diferente. Cada día nótome moito mais cómodo e iso é grazas á xente que traballa connosco todas as semanas. Tamén axuda que é o segundo ano de Pedro e coñece a categoría moi ben”. Eiras recoñece que goza moito nesta categoría “con partidos moi axustados ata o final, bo nivel de xogo por parte dos equipos. Para min, esta é a categoría máis bonita, xa que é a máis axustada, onde en calquera partido o de abaixo pode gañar ao de arriba e viceversa”.
Derbi do Lérez
E o sábado terán un fermoso reto por diante. Xa pitaron o derbi copeiro e agora lles toca o ligueiro co Teucro e o Cisne no máis alto da táboa. Pedro manifestou que “afrontámolo como un máis. Esta tempada xa diriximos o derbi de Copa do Rei e gozámolo moito, con bo ambiente e bo nivel de xogo. Esperamos que este sábado volvamos ter moito ambiente e moita xente no Municipal”.
Con respecto á arbitraxe galega, Eiras explicou que “o nivel de arbitraxe galega en liñas xerais é bo. Certo é que necesitamos traballar máis coa xente nova, que son a nosa substitución e futuro, e unificar criterios para chegar a ser o referente que 30 anos atrás foi a arbitraxe galega”.
That is really fascinating, You are an overly professional blogger. I have joined your rss feed and look forward to in search of extra of your great post. Additionally, I’ve shared your website in my social networks!