Vigo, 06 de xullo de 2026
Bruno López Molina tomou posesión hoxe como presidente da Federación Galega de Balonmán, iniciando un novo mandato á fronte da entidade tras a finalización do proceso electoral.
A nova Asemblea Xeral da Federación quedou constituída, culminando un proceso desenvolvido con total normalidade e conforme á normativa vixente, abrindo agora unha nova etapa na que a Federación pretende consolidar o traballo realizado nos últimos anos e afrontar novos retos estratéxicos para o balonmán galego.
Durante a súa intervención, Bruno López recoñeceu que a decisión de volver asumir a responsabilidade non foi sinxela.
«Tiven moitas dúbidas porque foron sete anos moi intensos en cun desgaste persoal moi grande, nos que fomos a unha velocidade que en moitas casos superaba o límite da nosa estrutura. A Federación Galega de Balonmán é un reto que require unha dedicación absoluta. Pero, por riba de todo, esixe manter a mente sempre aberta, con capacidade para innovar, cuestionarse o que se fai e buscar constantemente novas formas de mellorar. E iso, co ritmo de traballo que levamos cada día, é probablemente o máis difícil de conseguir.. Finalmente, as circunstancias actuais e, sobre todo, os numerosos proxectos que temos iniciados e os que aínda quedan por desenvolver animáronnos a continuar, polo menos, durante catro anos máis.»
O presidente destacou que este novo mandato estará marcado pola renovación e pola modernización da estrutura federativa.
«Comezamos unha nova etapa na que haberá cambios importantes tanto na Xunta Directiva como na estrutura da Federación. Queremos seguir evolucionando, incorporar novas ideas e rodearnos de persoas con ilusión, capacidade e compromiso para continuar facendo medrar o balonmán galego.»
Entre os principais obxectivos para os vindeiros anos, a Federación Galega de Balonmán centrarase en:
- Incrementar a visibilidade do balonmán galego.
- Reforzar a estrutura organizativa da Federación.
- Impulsar a promoción do balonmán en todo o territorio galego.
- Mellorar a formación, captación e desenvolvemento do colectivo arbitral.
- Fortalecer e seguir prestixiando as competicións autonómicas.
- Axudar aos clubs no seu crecemento, formación, profesionalización e mellora da súa xestión.
Así mesmo, Bruno López confirmou que a Federación xa está a traballar en varios proxectos de gran relevancia para situar Galicia como un referente internacional.
«Estamos a manter conversas moi avanzadas para traer a Galicia varios eventos internacionais de máximo nivel. Queremos que a nosa comunidade siga sendo un escaparate do balonmán e que estes eventos sirvan tamén para inspirar aos nosos/as deportistas, promocionar o noso deporte e xerar un importante retorno económico e social para Galicia.»
O presidente concluíu agradecendo a confianza depositada pola nova Asemblea Xeral e reafirmando o seu compromiso de manter unha Federación aberta, próxima aos clubs e centrada en ofrecer máis e mellores servizos a todas as persoas que forman parte do balonmán galego.
«O único obxectivo desta Federación é seguir facendo crecer o balonmán galego. Temos unha base extraordinaria, clubs que realizan un traballo exemplar e persoas moi comprometidas. Agora tócanos seguir construíndo entre todos unha Federación máis forte, máis moderna e máis útil para todo/as»
