A galega Aitana Santomé (Conservas Orbe Rubensa Porriño) foi convocada polo seleccionador das Guerreiras júnior, Imanol Álvarez, para a próxima actividade, que terá lugar do 21 ao 4 de outubro. Ademais, tamén forma parte da convocatoria a xogadora ilicitana do Atlético Guardés, Paula Arcos.
Esta actividade está dividida en dúas quendas. Do 21 ao 27 de setembro concentraranse na Universidade Camilo José Cela de Madrid, situada en Villanueva de la Cañada, mentres que a semana do 27 ao 4 de outubro a concentración desenvolverase en Guadalaxara.
Aitana é unha das xogadoras fixas nas convocatorias de Álvarez. Estivo na última que se puido celebrar (en novembro) e tamén formaba parte do grupo que ía a disputar o Torneo Rostov en Rusia a finais de marzo, que tivo que ser suspendido pola pandemia mundial da COVID-19. Agora toca volver ao traballo e tentar poñerse en forma para a disputa do Mundial Júnior de Romanía, que se retrasou do mes de xullo a decembro.
Na ligazón tedes a convocatoria co plan de traballo.
