O circuíto regresa cunha nova edición que percorrerá Cangas, Poio e Vigo para achegar o balonmán á rúa e aos máis pequenos e pequenas da provincia.
A Copa 5×5 de Balonmán na Rúa Deputación de Pontevedra regresa este 2026 cunha nova edición que volverá encher de balonmán algúns dos espazos máis emblemáticos da provincia de Pontevedra. Tras o éxito das edicións anteriores, a competición impulsada pola Federación Galega de Balonmán, grazas á colaboración da Deputación de Pontevedra, consolídase como unha das grandes apostas pola promoción do balonmán base e pola práctica deportiva ao aire libre.
A edición de 2026 contará con tres sedes ao longo da provincia: Cangas, Poio e Vigo, que será a encargada de poñer o broche de ouro ao circuíto.
CANGAS, PRIMEIRA PARADA DO CIRCUÍTO 2026
A primeira cita da Copa 5×5 terá lugar en Cangas, onde arrincará oficialmente unha nova tempada desta competición que leva o balonmán fóra dos pavillóns e o achega directamente ás rúas e aos espazos de convivencia das diferentes localidades.
Antes do inicio da competición celebrarase a presentación oficial do circuíto, que terá lugar o venres 11 ás 17:00 horas na pista exterior situada no Paseo Marítimo de Cangas, xunto ao Concello.
Desde a Federación Galega de Balonmán convidamos a toda a cidadanía, familias, xogadores e xogadoras a asistir a este acto de presentación e acompañarnos no comezo dunha nova edición da Copa 5×5.
BALONMÁN NA RÚA PARA TODAS E TODOS
A Copa 5×5 naceu no ano 2024 co obxectivo de promover o balonmán entre os máis pequenos e pequenas, convertendo prazas, paseos marítimos e espazos urbanos en auténticas pistas de xogo.
O formato mantén a súa esencia: unha competición dinámica, divertida e accesible, pensada para que nenos e nenas desfruten do deporte nun ambiente lúdico e de convivencia, ao tempo que o balonmán gaña visibilidade entre toda a cidadanía.
A competición estará dirixida ás categorías benxamín e alevín, con equipos mixtos, fomentando a participación, a igualdade e a práctica deportiva desde as idades máis temperás.
TRES SEDES PARA UNHA NOVA EDICIÓN
O circuíto da Copa 5×5 de Balonmán na Rúa Deputación de Pontevedra 2026 percorrerá tres localidades da provincia:
- Cangas
- Poio
- Vigo
Cada unha das sedes converterase nun punto de encontro arredor do balonmán, levando a competición a lugares céntricos e de gran tránsito para que o deporte chegue a todas as persoas.
INSCRICIÓNS XA ABERTAS
As inscricións para participar na Copa 5×5 de Balonmán na Rúa Deputación de Pontevedra 2026 xa están dispoñibles a través da ligazón que indicamos máis abaixo.
Inscricións e toda a información: https://5x5pontevedra.fgbalonman.com/
Desde a Federación Galega de Balonmán animamos a todos os clubs, equipos, familias e nenos e nenas da provincia a formar parte dunha nova edición dunha competición que continúa medrando ano tras ano e que volverá converter as rúas da provincia de Pontevedra nunha gran festa do balonmán.
A Federación Galega de Balonmán quere agradecer especialmente á Deputación de Pontevedra o seu apoio e colaboración, fundamentais para facer posible unha edición máis desta iniciativa que continúa impulsando o balonmán base e achegando o deporte á cidadanía en toda a provincia.
