O balonmán galego respondeu á chamada da selección española nunha gran tarde en Vigo, onde España e Portugal asinaron un 37-37 que se decidiu coa última parada de Gustavo Capdeville sobre a bucina.
O IFEVI viviu este domingo unha das grandes citas do balonmán galego cun ambiente espectacular nas bancadas. A afección respondeu á chamada dos Hispanos, enchendo a instalación viguesa e acompañando á selección española durante todo o encontro ante Portugal, correspondente á EHF EURO Cup. Unha mostra máis do compromiso e da paixón que existe polo balonmán en Galicia, que se volcou coa selección nunha tarde especial para o deporte galego.
O apoio desde as bancadas acompañou un partido de máxima intensidade e igualdade entre dous equipos que ofreceron un encontro moi disputado. España e Portugal mantiveron a emoción ata os últimos segundos, nun duelo no que ningún dos dous combinados conseguiu abrir unha diferenza definitiva no marcador.
O desenlace estivo á altura do encontro. Co 37-37 no marcador, os Hispanos dispuxeron da última posesión para intentar levarse a vitoria. A xogada rematou cun fly de Ian Tarrafeta, pero o porteiro portugués Gustavo Capdeville apareceu para deter o lanzamento sobre a bucina e asegurar así o empate definitivo. Unha última acción que puxo o punto final a un encontro vibrante e que deixou aos asistentes cun final de máxima emoción.
Con este resultado, España pecha a súa participación nesta xanela da EHF EURO Cup con dous empates, despois do conseguido o pasado mércores ante Dinamarca. A selección non puido transformar en vitorias os dous compromisos disputados, pero si atopou en Vigo unha resposta extraordinaria por parte da afección, que converteu o IFEVI nun escenario de primeiro nivel para recibir aos Hispanos.
A Federación Galega de Balonmán quere expresar o seu agradecemento á Deputación de Pontevedra polo seu patrocinio, fundamental para facer posible a celebración deste encontro internacional e achegar o mellor balonmán á provincia, así como á Xunta de Galicia pola súa colaboración. Agradecemento que se estende tamén a todas as persoas e entidades implicadas na organización e, moi especialmente, á afección galega, que coa súa presenza e apoio demostrou que Galicia é unha terra de balonmán.
