A Federación Galega de Balonmán celebrou o pasado 27 de febreiro de 2026 a súa Asemblea Extraordinaria relativa ao Proceso Electoral 2026, que tivo lugar de maneira telemática en segunda convocatoria ás 19:30 horas.
A sesión contou coa participación de representantes dos distintos estamentos federativos —clubs, árbitros/as, adestradores/as e xogadores/as— e foi presidida por Bruno López Molina, quen abriu a reunión agradecendo a asistencia e explicando os detalles do proceso electoral para a renovación dos órganos de goberno da Federación .
Transparencia e información permanente
Durante a súa intervención, o presidente presentou as sete fases do proceso electoral, incidindo na importancia da máxima transparencia e na necesidade de manter informados a todos os estamentos ao longo dun procedemento que, pola súa duración, require especial seguimento. Así mesmo, animou aos clubs a trasladar toda a información aos seus federados/as e destacou a relevancia da revisión dos censos conforme á normativa vixente .
Tamén se informou da composición da Comisión Xestora, lembrando o réxime de incompatibilidades no caso de presentación de candidaturas aos distintos órganos federativos .
Elección da Xunta Electoral
Un dos puntos centrais da sesión foi a elección da Xunta Electoral, órgano clave para garantir a legalidade e transparencia do proceso. Ante a ausencia de candidaturas voluntarias, a proposta presentada pola presidencia foi aprobada pola totalidade das persoas asistentes .
Aprobación unánime do Código, Regulamento e Calendario Electoral
A Asemblea aprobou por unanimidade os tres documentos fundamentais do proceso electoral:
- Código de Bo Goberno
- Regulamento Electoral
- Calendario Electoral
Todos eles condicionados ás posibles modificacións que poida resolver a Secretaría Xeral para o Deporte .
O calendario foi deseñado co obxectivo de que o novo equipo de goberno poida iniciar a xestión da tempada deportiva desde o seu comezo, garantindo así a estabilidade organizativa da Federación.
Outros asuntos
Durante a sesión tamén se informou sobre o estado do circuíto de Balonmán na Rúa 5×5, animando aos clubs interesados en albergar probas a comunicar o seu interese .
A Asemblea pechouse ás 20:12 horas sen máis intervencións por parte dos/as asistentes .
Lémbrase a todas as persoas interesadas que poden consultar toda a información do proceso electoral na páxina web da federación ou premendo no seguinte enlace: https://fgbalonman.es/eleccions-2026/
