A FEDERACIÓN GALEGA DE BALONMÁN E A EMPRESA GALICIAN SPORTS ACADAN UN ACORDO PARA A PRODUCIÓN POR STREAMING DO BALONMÁN GALEGO

A Federación Galega de Balonmán acadou un acordo coa empresa galega Galician Sports para poder retransmitir por streaming encontros do balonmán galego. Galician Sports conta cunha ampla experiencia na produción audiovisual de eventos deportivos e, tras varias conversas coa Federación Galega de Balonmán, ambas partes chegaron a un acordo para que o balonmán galego poida chegar a todos os fogares.

O pavillón de O Consello en Ribadavia será esta fin de semana o primeiro dos escenarios desta iniciativa. A causa dos imprevistos provocados pola COVID-19, a federación aínda non sabe si se poderá retransmitir o encontro de categoría cadete masculina entre o Carnes do Ribeiro e o Balonmán Porriño ás 12 da mañá, pero o que si é seguro é que poderemos desfrutar do encontro de primeira Nacional Masculina entre o Carnes do Ribeiro Ourense Provincia Termal  e o MAGOPE Seis do Nadal Coia, ás 18:00 horas.

O presidente da FGBm, Bruno López, manifestou a súa satisfacción por este acordo que “é un gran paso para o balonmán galego. Esta semana teremos a primeira toma de contacto en Ribadavia, onde estaba prevista unha xornada con catro encontros, pero a causa das circunstancias actuais houbo cambios e ao mellor tan só podemos comezar co encontro de Primeira Nacional. De todos os xeitos a nosa intención é que nas próximas semanas poidamos gozar das categorías autonómicas, sénior e de base. O noso compromiso foi poñer en valor as nosas competicións e a súa imaxe, e estamos seguros de que o acadaremos. A pesar da difícil situación que estamos a vivir, temos propostas que darán maior valor e atractivo ás nosas competicións”. Esta transmisión é especialmente importante nun momento no que o aforo aos recintos deportivos está moi restrinxido ou incluso pechado, dependendo da situación sanitaria na que nos atopemos, polo que é unha forma de permitir a toda a afección do balonmán galego seguir vibrando co xogo dos seus clubs.

Nestes comezos, o streaming da Federación Galega de Balonmán rotará semanalmente polos diferentes puntos da xeografía galega ata poder chegar a un acordo que abarque máis encontros de xeito simultáneo.

Deja un comentario

Tu dirección de correo electrónico no será publicada. Los campos obligatorios están marcados con *