A familia do balonmán galego ten un novo membro! O Sanxenxo Balonmán asoma a cabeza e anuncia a súa intención de traballar de forma firme neste municipio para conseguir que o noso deporte medre e se implante. Así nolo conta Silvia Ramírez, presidenta do club, que se meteu nesta gran aventura xunto ao seu marido, Wallace Moreira, Cristina Ramírez, Vera Fernández e Wladmir Castiglia.
Recoñece Silvia que a idea de crear un club estaba na súa cabeza dende hai tempo e agora, que cambiaron de municipio por motivos persoais, pensaron que era o momento. “Todo parte dun soño que tiñamos de crear nun futuro un club e debido a un actual cambio de provincia, pensamos: E por que non agora? E foi así como nos decidimos a levalo a cabo, aínda que sabemos que é necesario moito esforzo inicial, tanto humano como económico”, explicou Silvia.
E unha vez que se decidiron comezaron os contactos coas institucións e atopáronse co total apoio da Concellaría de Deportes de Sanxenxo, “á que agrademos enormente a súa aposta, que foi a que nos motivou a iniciar aquí o proxecto”.
Comezan de cero e saben que toca traballar e moito. Realizarán visitas escolares e xornadas de portas abertas co fin de chegar ao máximo de categorías, pero saben que o proxecto irá medrando pouco a pouco. “o noso obxectivo principal é potencial o deporte e fomentar a igualdade e a participación. Empezamos de cero, polo que inicialmente non é tan importante para nós o resultado como a adhesión de nenas e nenos e o interese polo balonmán”.
Balonmán como nexo de unión
Precisamente foi o balonmán o que uniu a Silvia e Wallace e quizáis por iso queren emprender este proxecto xuntos. Wallace, de orixe brasileiro, leva 27 anos nas pistas de balonmán. No seu país logrou éxitos a nivel estatal e en Galicia foi adestrador do Línea 21 e actualmente é árbitro. Ambos coñecéronse grazas ao balonmán nun campus e Wallace transmitiulle a Silvia o seu amor polo balonmán. E agora, unidos, emprenden este fermoso proxecto, ao que dende a Federación Galega de Balonmán queremos desexarlle a mellor das sortes.
Todas as persoas interesadas en poñerse en contacto co Sanxenxo Balonmán poden facelo a través de correo electrónico sanxenxobalonman@gmail.com ou no teléfono 667994333.
